TUGAS MEMBUAT MEDHAR SABDA
TEMA SABDA PENGETAN DINTEN PENDIDIKAN
Sebagai Tugas Akhir Semester V Mata Kuliah Retorika Jawa
yang Diampu oleh Drs. Imam Sutardjo, M. Hum
Disusun Oleh
Dwi Lestari (C0111012)
JURUSAN SASTRA DAERAH
FAKULTAS SASTRA DAN SENI RUPA
UNIVERSITAS SEBELAS MARET
SURAKARTA
2013
Sabda
Pengetan Dinten Pendidikan Nasional
Bismillahirrahmanirrahim
Assalamualaikum warahmatullahi wa barakatuhu
Innalhamda lillahi nahmatuhu wanastainu wanastaghfiruhu,
wanaudzubillahi minsyururi anfusina wa minsayyiati a’malina, mayyahdilahu falaa
mudzilallah wamayyudlilhu falaa haadiyalah, asholatu wassalamu ‘ala rasulillahi
laa nabiyya ba’dahu
Bapak pembantu rektor setunggal, pembantu rektor kalih saha pembantu rektor
tiga ingkang satuhu kinurmatan, Bapak-bapak, ibu-ibu dalah sedaya karyawan UNS
ingkang tansah bagya mulya sarta mahasiswa UNS sing dakbanggakake lan
daktresnani.
Minangka pambukaning lampah, sumangga kita sedaya tansah
angunjukaken puja astawa puji astuti wonten ngarsanipun Gusti Allah SWT ingkang
sampun paring rahmat, berkah saha hidayah dhumateng kita sedaya katitik kita
sami saged rawuh makempal wonten ing palataran rektorat mriki.
Shalawat saha
salam tansah kita aturaken wonten ngarsanipun nabi agung Muhammad Rasulullah SAW
ingkang tumurun wonten jagad raya menika minangka rahmatan lil alamin, anjagi
ayem tentrem saha berkahipun alam semesta, minangka uswatun hasanah lan dwija
luhur kita ingkang patrap lan subasitanipun pantes tinulad kangge sedaya tiyang
wonten ing alam dunya lan ing alam akhirat badhe paring syafaat utawi
pitulungan rikalanipun yaumul hisab. Ingkang
sampun marisaken Alquran saha hadis, menawi kalih tetilaran menika
tansah kita ugemi lan dipunamalaken kanthi temen, temen-temen, tumemen,
temenanan saha istiqomah saged anjalari gesang kita bahagia fidunya wal
akhirah.amin
Para ingkang sami rawuh, bangsa Indonesia saben tanggal 2 Mei tansah
mengeti dinten pendidikan nasional. Salebetipun mengeti dinten sejarah menika temtunipun kita kemutan
tokoh pendidikan nasional KI Hajar Dewantara ingkang anggadhahi asma alit
Suwardi Suryaningrat. Bapak tokoh pendidikan menika anggadhahi sesanti Ing
ngarsa sung tuladha, ing madya mangun karsa saha tut wuri handayani ingkang tegesipun
wonten ing ngajeng paring
tuladha, wonten ing tengah paring... lan
wonten ing wingking paring daya kekiyatan utawi semangat. Piyambakipun minangka
pelopor pendhidhikan putra-putri
bangsa Indonesia ingkang sampun ngentasaken saking jaman kabodhoan tumuju jaman kawasisan.
Bapak-bapak saha ibu-ibu dalah mahasiswa UNS ingkang bagya mulya, pendhidhikan
kangge bangsa Indonesia nggadhahi artos ingkang wigatos sanget jalaran
kemajenganipun satunggaling bangsa boten uwal saking pendhidhikan
ingkang sampun dipunpikantuk.
Menawi masarakat satunggaling negari
nengenaken pendhidhikan pramila negari badhe majeng, nanging
kosokwangsulipun menawi nglirwakaken badhe ngalami kamunduran.
Para rawuh ingkang tansah winantu ing pakurmatan, pendhidhikan mujudaken prekawis ingkang wigatos sanget kangge sedaya umat manungsa. Saking
wigatosipun pendhidhikan saengga Allah mratelakaken
wonten ing Al-quran ingkang ungelipun “... boten sami antawisipun tiyang
ingkang gadhahi ngelmu kaliyan tiyang ingkang boten gadhahi ngelmu” sarta
wonten ing salebeting hadits ingkang ungelipun “ngudi kawruh wajib menggahipun
/ tumrapipun saben tiyang muslim jaler saha estri.
Bapak-bapak, ibu-ibu dalah mahasiswa ingkang bagya mulya, mengĂȘti dinten pendidikan nasional
menika boten cekap namung mahargyakaken
kanthi ngawontenaken upacara bendera, lelomban kados cerdas cermat, jalan sehat lan sapanunggalipun nanging
ingkang langkung wigati inggih menika sumangga kita uwosi pengetan dinten pendidikan menika kanthi sengkut makarya
miturut profesi ingkang dipun-gadhahi piyambak-piyambak. Kangge para pelajar
lan mahasiswa kedah tumemen anggenipun ngudi kawruh supados julukanipun minangka agent
of change “agent perubahan” saestu saged dipunwujudaken wonten salebeting
bebrayan ingkang dipunyatakaken
kanthi keprigelanipun paring solusi kagem sedaya prekawis bebrayan.
Para rawuh ingkang tansah bagya mulya, sumangga kita tansah manunggal, sami
tulung tinulung lan guyub rukun kagem mujudaken masarakat Indonesia ingkang
adil, makmur, cerdas, dinamis, gadhah patrap lan subasita ingkang mulya saha boten
ketilaran babagan kawruh agaminipun kagem mbangun Indonesia tumuju negari
ingkang majeng wonten ing sedaya babagan.
Kita kedah pitados menawi kanthi makarya tumemen lan hameminta pitulungan
dhumateng Gusti ingkang Mahakuwaos pramila gegayuhan mujudaken masarakat
Indonesia ingkang majeng lan unggul saged kasembadan.
Bapak-bapak lan ibu-ibu dosen, sedaya karyawan sarta mahasiswa UNS ingkang
kebak ing kabagyan, cekap semanten atur kula, menawi kathah kekirangan saha
cecer cewet miwah kuciwanipun kula nyuwun agunging samudra pangaksama.
Dhahar kupat janure wis tuwa, menawi wonten
atur kula lepat nyuwun pangaksama.
Wabillahi taufiq wal hidayah, wa ridho wal
inayah.
Wassalamualaikum Warahmatullahi wa barokatuh
Tidak ada komentar:
Posting Komentar